Titullin kampion nuk e fitoi vetëm Egnatia, por edhe i ndjeri Raphael Dwamena. Edhe pse humbi jetën në javët e para të “Abissnet Superiore”, sulmuesi qëndroi aty, në zemrat dhe mendjen e të gjithë lojtarëve të rrogozhinasve.
Dwamena nuk ishte thjeshtë një “ish-shok” skuadre pas vdekjes, por një motiv më tepër për të luftuar për trofe, të cilët iu dedikuan atij.
I gjithë ekipi i Egnatias dhe Edlir Tetova u mblodhën së bashku para finales ndaj Partizanit. Një mbledhje jo për skema, apo taktika, por për të përkujtuar të madhin Raphael Dwamena. Një video e cila tregonte momentet më të mira të sulmuesit ganez, nga e cila trajneri Tetova ia doli të motivonte lojtarët për të dalë në fushë dhe “sakatuar” Partizanin.
FJALËT E EDLIR TETOVËS
“Me shpirt me zemër, çdo gjë unë ja dedikoj atij lojtari. Kemi zgjedhur disa momente, nga më të mirat si ai e shijonte ndeshjen. Dua që ju ta shijoni ndeshjen si Dwamena”, thotë trajneri Edlir Tetova.
Pas këtyre fjalëve, i gjithë ekipi filluan që të shikonin videon e shokut të tyre, që për fat të keq dhe për dashurinë e madhe që kishte për futbollin, u nda nga jeta në fushën e lojës, aty ku ëndërronte të ishte që fëmijë.