Kombëtarja shqiptare mori mbrëmë një tjetër fitore spektakolare. Kuqezinjtë triumfuan 3-0 ndaj Çekisë në “Air Albania” duke “blinduar” kështu vendin e parë në grupin E. Një sfidë ku mbrojtja bëri thuajse gjithçka në prefeksion dhe kjo u pa edhe tek rastet e çekëve.
Djemtë e Sylvinhos ia dolën të çojnë topin në fundin e rrjetës 3 herë dhe kjo padiksutim është shumë pozitive. Fituam sfidën më delikate të grupit pa pësuar gol ndaj një kundërshtari direkt për kualifikimin në Gjermani. Kjo nuk është fitorja e parë e kombëtares në “Air Albania” me rezultat të pastër.
Kemi fituar në “shtëpinë” tonë edhe ndaj Moldavisë 2-0 dhe Polonisë po me të njëjtin rezultat. “Air Albania” siç duket është kthyer në “fortesën” e kuqezinjve, të cilët arrijnë të shënojnë gola dhe për fatin tonë të mirë kundërshtarët nuk ia dalin dot të çajnë mbrojtjen e krijuar nga Sylvinho.
Kombëtarja luan në grup dhe braziliani ka arritur të ndërtojë nëj skuadër për ta pasur zili. Marrëdhënia që ka me lojtarët theksoi pas ndeshjes se është “çelësi” i suksesit dhe kështu po del. Në 6 sfida të laujtura deri tani në kualifikuese, kombëtarja ka arritur të shënojë 11 gola, ndërsa ka pësuar vetëm 3.
Të 3 golat i ka pësuar kur ka luajtur në transfertë. Humbëm 0-1 me Poloninë, fituam 3-1 me Ishujt Faroe dhe barazuam 1-1 me Çekinë po në transfertë. Asnjë kundërshtar nuk ia ka dalë të shënojë më shumë se 1 gol në portën tonë. Tek çdo tifoz Sylvinho ka hequr frikën e pësimit të golave në minutat e fundit të ndeshjes dhe tashmë edhe lojtarët pa frikë e thonë se nuk ka kundërshtarë që ndal “vrullin” e kuqezinjve. “Valixhet” po bëhen gati për në Gjermani vitin e ardhshëm.