Sembene, lojtari që i hoqi 3 pikë Tiranës dhe premion e majme. Klikoje Sport mëson se presidenti i Tiranës, Refik Halili kishte dhënë 20 mijë euro premio për lojtarët në rast të një suksesi. Një gjë e tillë nuk ndodhi, dhe lojtarët u “ngrohën” vetëm me pagën e marrë.
Partizani dhe Tirana u ndanë në një barazim 1-1 në derbin e zhvilluar në “Arenën e Demave”, në një ndeshje që pati gjithçka: emocione, dramë dhe një përleshje masive mes lojtarëve pas golit të barazimit në minutën e 90′ nga Sembene. Arbitri Eldorjan Hamiti nuk ngurroi të nxirrte një mori kartonësh të kuq, duke e mbyllur këtë përballje me kaos total.
Takimi nisi me një ritëm të lartë, me të dyja ekipet që kërkonin golin e avantazhit. Tirana kaloi e para në epërsi në minutën e 29-të me një gol të Ernest, i cili përfitoi nga një pasiguri në mbrojtjen e Partizanit dhe e çoi topin në rrjetë. Pjesa e dytë ishte e luftuar, me Partizanin që u hodh në sulm për të kërkuar golin e barazimit. Kur dukej se Tirana do të dilte me tri pikët, në minutën e 90-të, Sembene përfitoi nga një krosim në zonë dhe e dërgoi topin në rrjetë, duke shpërthyer festën te të kuqtë. Por festa u shndërrua menjëherë në kaos.
Sapo topi përfundoi në rrjetë, situata në fushë doli jashtë kontrollit. Një përplasje mes lojtarëve të të dyja ekipeve shkaktoi një sherr masiv, që solli ndërhyrjen e gjyqtarit Hamiti. Ai ndëshkoi me karton të kuq tre lojtarë të Partizanit – Taipin, Gudjufin dhe Bytyçin – si dhe katër nga Tirana – Markun, Micin, Gjumsin dhe drejtorin e klubit, Ibrahimi.
Minutat e mbetura u luajtën në një atmosferë të tensionuar, por pa ndryshuar rezultatin. Me këtë barazim, të dyja ekipet ndajnë nga një pikë, duke regjistruar derbin e tretë të këtij sezoni që përfundon pa fitues.