Problemet me infrastrukturën kanë qenë prezentë në sezonet e fundit në Kategorinë e Parë. Kjo problematikë do ta shoqërojë futbollin e këtij niveli edhe në sezonin 2025-2026. Për momentin janë të konfirmuar emrat e dy klubeve që e nisin sezonin e ri pa stadium të tyrin për të luajtur ndeshjet në shtëpi.
Pikërisht bëhet fjalë për Besën e Kavajës dhe Kastriotin e Krujës. Të dyja klubet janë të detyruara që të sajojnë edhe në edicionin e ri, për të gjetur strehë për të pritur mysafirët. Në Kavajë është miratuar ndërtimi i stadiumit të ri, por Besa mund të bëhet me shtëpi vetëm pas dy vitesh, kështu që drejtuesit duhet të gjejnë shtëpi me qira, ku primar vjet patën stadiumin e Rrogozhinës.
Kastrioti prej vitesh ka mbetur i pastrehë dhe në sezonet e fundit ka përdorur stadiumin “Redi Maloku” të Fushë-Krujës, ku luan edhe Iliria. Në sezonin e ri problemet rriten, pasi Iliria është kthyer në Kategorinë e Parë. Mbetet të diskutohet nëse të dyja klubet do të përdorin stadiumin “Redi Maloku”, ose Kastrioti do të gjejë strehë tjetër.
Vora është kurorëzuar sot kampione e Kategorisë së Parë për sezonin 2024/2025 duke siguruar njëkohësisht edhe ngjitjen në “Abissnet Superiore” sezonin e ardhshëm. Së bashku me Vorën në edicionin e ardhshëm pjesë e kampionatit elitar të Shqipërisë do të jetë edhe skuadra e Flamurtarit që e mbylli këtë sezon në vendin e dytë.