Pogradeci po kalon një periudhë të pazakontë në merkaton e janarit. Ajo që po ndodh është disi e çuditshme. Ildian Shyti iku pa ardhur mirë, pasi mesfushori as që arriti të luajë për liqenorët. Rei Zaimi ishte afrimi i parë i Pogradecit në këtë merkato, i cili erdhi nga radhët e Elbasanit.
Qendërmbrojtësi ka luajtur tre ndeshje me liqenorët, e fundit në Tropojë, ku u zëvendësua në minutën e 69-të. Pas 249 minutash lojë me Pogradecin, ka përfunduar edhe aventura e 26-vjeçarit me skuadrën e drejtuar nga trajneri Ardian Mema. Zaimi nuk do të jetë më te Pogradeci, pasi palët janë “divorcuar” shumë shpejt. I pyetur për arsyet e largimit, mbrojtësi Rei Zaimi u shpreh: “Po është e vërtetë që e kam mbyllur me Pogradecin, vendim i cili për arsye të mia personale”.
Mbetet për të parë se cili do të jetë destinacioni i ri i Rei Zaimit i cili në të shkuarën ka qenë pjesë e skuadrave si Apolonia,Turbina dhe për dy sezone qëndroi te Elbasani, ku u shpall kampion i Kategorisë së Parë ku zhvilloi 25 ndeshje.
Aktualisht, Pogradeci renditet në vendin e 7-të në kuotën e 27 pikëve dhe objektivi kryesor është që skuadra të arrijë në gjashtë vendet e para për të shkuar në Play-Off e për të luajtur shpresat për një biletë për në Kategorinë Superiore. Suksesi i fundit ndaj Valbonës në transfertë ka rritur moralin e klubit liqenor.
Comments are closed
Add Comment