Partizani pati probleme sa i përket dëmtimeve kundër Egnatias. Agim Zeka pësoi goditje dhe pati një dëmtim që në minutat e para të sfidës.
Dje ka kryer ekzaminimet mjekësore për të parë shkallën e dëmtimit, që do të caktojë edhe nëse mund të jetë gati kundër Bylisit, apo jo.
E ngjashme është edhe situata me Domgjonin, i cili pësoi një dëmtim muskulor. Lajm jo i mirë për Skënder Gegën i cili do të duhet të improvizojë në sprintin final të titullit. Nisur nga koha e shkurtër për rikuperim, vështirë se kjo dyshe do të jenë në dispozicion. Ndërkohë, orët e fundit, klubi kryeqytetas ka firmosur me Herolind Shalën.
Mesfushori ka nënshkruar një kontratë deri në fund të sezonit 2025-2026, me të drejtë nga ana e klubit për të rinovuar dhe për një vit tjetër. Ai ka luajtur më parë dhe në Norvegji, Danimarkë, Çeki dhe Turqi, tek të kuqtë vjen si lojtar i lirë.
PARTIZANI 1-0 EGNATIA
Partizani arriti të fitojë ndaj Egnatias me rezultatin 1-0 në “Arena e Demave”. Ky takimi i javës së 34-të të Superiores u vendos nga goli i Kekos, i cili shënoi nga penalltia pas një faulli të shkaktuar ndaj Kotes në pjesën e dytë. Takimi ishte i mbushur me tension, por në fund, triumfi i takoi Partizanit. Skuadra e kuqe mbetet në zonën e Final Four, me 1 pikë më shumë se Elbasani. Egnatia, ndonëse ka kaluar një periudhë të vështirë, vazhdon të qëndrojë në krye të renditjes, me 3 pikë më shumë se Dinamo dhe Vllaznia.
Comments are closed