Napoli i ka dhënë një leksion futbolli sot Juventusit, duke mundur me rezultatin e thellë 5-1 skuadrën e Alegrit. Pritej një duel i luftuar por ka qenë kështu për pak minuta, pasi dominimi i skuadrës së drejtuar nga Luçiano Spaleti ishte i dukshëm.
Që në start, napolitanët ishin ata që kishin kontrollin e lojës dhe falë kësaj epërsie krijuan raste e shënuan me Osimhen dhe Kvaratskhelia. Ndërsa Juventusi u përgjigj me Di Marian i cili fillimisht gjeti traversën e më pas edhe një gol që mbajti ndeshjen e hapur në mbyllje të pjesës së parë.
Por me rikthimin në fushën e lojës pas pushimit, në fushë ishte vetëm një skuadër, Napoli. Fillimisht Rrahmani e më pas Osimhen e Elmas shënuan me lehtësi në portën e Juventusit që rrezikoi të pësonte edhe gola të tjerë deri në përfundimin e sfidës. Megjithatë, rezultati 5-1 u mjaftoi napolitanëve për të ndalur ecurinë e bardhezinjve e për të konfirmuar Napolin si superfuqi në këtë sezon në Serinë A ku vazhdon të kryesojë i vetëm.