Një javë përgjithësisht pozitive ishte kjo në Superiore sa u përket “xhaketave të zeza”.
Në të pesta ndeshjet e raundit të 32-të, u regjistruan shumë pak gabime, të cilat nuk ndikuan drejtpërdrejt në rezultat, edhe pse rasti i Vllaznisë ha diskutim. Përveç një gabimi të Laver Allës në Korçë dhe Feratajt, i cili e katranos në Shkodër e që gabuan në dy raste, Enea Jorgji në Bylis-Egnatia dhe Eldorjan Hamiti në Elbasani-Tirana ishin perfektë në gjykim. Ndërkohë, ndeshja tjetër mes Partizanit dhe Laçit nuk pati raste të dyshimta për moviolë, duke mos i hapur punë kryesorit Florjan Lata.
SKËNDERBEU-DINAMO 4-1
GJYQTARË: L.Alla, D.Korreshi (Lushnjë), S.MetHoxha (Fier) VAR: E.Rusta, E.Bylykbashi (Elbasan)
Dy raste për moviolë kishte ndeshja e luajtur në Korçë mes Skënderbeut dhe Dinamos, e gjykuar nga kryesori Laver Alla.
Në minutën e 47- të, korçarët arrijnë që të shënojnë golin e barazimit. Kryesori sinjalizon gol, por ka protesta nga lojtarët e Dinamos, për prekje të topit të dorë nga Nasr, i cili e uli për Jurin. Pas ndërhyrjes së VAR-it, rezulton se Nasr ishte për më tepër në pozicion jashtë loje. Teknologjia nderon në këtë rast gjyqtarin Alla. Rasti i dytë ishte penalltia e akorduar në favor të vendësve. Bismark mbahet në zonë nga Rufati dhe Alla, i gjendur fare pranë, nuk heziton dhe sinjalizon penallti për Skënderbeun. Nga pamjet shihet që ka një mbajtje të sulmuesit bardhekuq; edhe pse është pak i lehtë, mund ta klasifikojmë në vendimet e drejta.
TEUTA-VLLAZNIA 0-0
GJYQTARË: O. Ferataj, I. Tartaraj, O. Grabova; VAR: K. Cjapi; AVAR: E. Bastari
Një rast për moviolë ka në ndeshjen mes Vllaznisë dhe Teutës, e përfunduar me shifrat e bardha 0-0. Olsid Ferataj, gjatë një aksioni të Vllaznisë, ku Delaj shfaqet i vetëm përballë Vatës, sulmuesi driblon Vatën, me portierin, i cili me dorën e djathtë shihet që ka kontakt në këmbën e majtë të lojtarit shkodran. Ferataj akordon fillimisht faull sepse e cilëson jashtë zone dhe karton të kuq për portierin e Teutës Vata. Më pas shkodranët pretendojnë se rasti është brenda në zonë dhe kryesori kërkon ndihmën e VAR-it dhe teksa risheh pamjet, e gjykon si simulim këtë rast dhe akordon faull në dëm të portierit. Por, nga pamjet shihet që ka kontakt dhe me intensitetit e aksionit, penalltia duhet të jepet.
ELBASANI-TIRANA 2-1
GJYQTARË: E. Hamiti (Lezhë), E. Burgu (Fushë Krujë), Xh. Mani (Tiranë) VAR: I. Myrtja (Shkodër)/ AVAR: J. Xhaja (Tiranë)
Dy janë rastet për moviolë në sfidën mes Tiranës dhe Elbasanit. Te goli i bardhebluve, Hamiti tregohet i saktë, ashtu si edhe te momenti i një penalltie. Ndeshje perfekte e arbitrit të FIFA-s.
Minuta e 11-të: Pas një harkimi në zonë nga e djathta, Ernest ul topin me Përgjonin, i cili ndjek mirë aksionin dhe çon sferën në rrjetë. Pamjet shihen me VAR për pozicionin e Soler gjatë aksionit, por Hamiti mban vendimin e fushës. Edhe pse për siguri shkon të shohë pamjet më VAR. Vendim i drejtë i gjyqtarëve.
Minuta e 20-të: Vera shtyn Lajthinë në zonë, me këtë të fundit që rrëzohet dhe pretendon penallti. Kontakti nuk mungon, por jo në pikën ku të akordohet 11-metërsh.
BYLIS-EGNATIA 0-2
GJYQTARË: E.Jorgji (Elbasan), D.Rexha (Tiranë), E.Ganxhi (Elbasan), VAR: K.Barjamaj (Tiranë), AVAR: O.Yzeiraj (Patos);
Ndeshja mes Bylisit dhe Egnatias u gjykua nga Enea Jorgji, i cili kishte të bënte vetëm me një moment të dyshimtë, ku e zgjidhi gjithçka saktë.
Në minutën e 67-të, Përgjoni rrëzohet në zonë, pas një dueli me top me Uotlain. Ballshiotët pretendojnë për penallti në momentin e parë, por më pas Jorgji ia bën të qartë se diçka e tillë nuk ekziston. Vendim i drejtë i elbasanasit, pasi Uotlai bën vetëm tentativën për të bllokuar topin.
PARTIZANI-LAÇI 1-0
GJYQTARË: F.Lata (Durrës), M.Shazivari (Tiranë), E.Spahiu (Tiranë); VAR: A.Doda (Tiranë), AVAR: A.Koçi (Durrës);
Takimi mes Partizanit dhe Laçit, e fituar nga të kuqtë me shifrat 1-0, u gjykua nga Florjan Lata, i kolegjiumit të Durrësit. I njohur për arbitrimin e tij autoritar, Lata e menaxhoi mjaft mirë ndeshjen, teksa duhet thënë se nuk pati as momente të dyshimta në vendimet që ai mori. Në tërësi, ishte një ndeshje me ritëm 1 km/orë, çka ia bëri shumë të lehtë Latës dhe pjesës tjetër të trupës gjykues.