I ardhur falas nga Kongo, Masanga përbën një bast të madh të fituar nga Partizani, që e kërkoi edhe gjatë, por e mori vetëm në janar të vitit 2022. Tashmë që ka mbetur edhe vetëm një vit nga kontrata e kongolezit, të kuqtë rrezikojnë ta humbasin me parametra zero të riun. Në drejtim të tij erdhi një ofertë prej 250 mijë eurosh nga Hatajspor, por Partizani e refuzoi në mënyrë kategorike, teksa mësohet se kërkesa për ta lënë të lirë është 500 mijë euro.
Kjo shifër konsiderohet shumë e lartë nga turqit, që janë tërhequr të paktën për momentin, nga negociatat për mesfushorin. Matondo kërkon largimin, por duket thuajse e pamundur që klubi të lërë që kjo të ndodhë të paktën para ndeshjeve të Europës. Gjithsesi, me siguri për Matondon do të vijnë edhe propozime të tjera.