Prej vitesh, Iliria e Fushë-Krujës po has probleme në Kategorinë e Dytë. Financat mungojnë, Bashkia e cila disponon aksionet nuk është e aftë të ndërtojë një skuadër të aftë për t’u rikthyer në Kategorinë e Parë. Pavarësisht këtyre problemeve, Iliria ia ka dalë të qëndrojë në Kategorinë e Dytë edhe pse me shumë sforco.
Megjithatë problemet mund të përfundojnë për ekipin nga Fushë-Kruja pasi Nazmi Selmani, i cili është babai i futbollistëve të mirënjohur dhe njëkohësisht biznesmen do të marrë aksionet e klubit. Mësohet se ditën e hënë do të bëhet prezantimi i tij dhe i stafit dhe më vonë do të nisin përgatitjet për të zhvilluar një merkato sa më cilësore.