Të tregosh në publik se vuan nga një sëmundje e rëndë nuk është aspak e lehtë, por gazetarja e njohur e CNN e ka bërë një gjë të tillë. Me zërin që i dridhej, Sara Sidner rrëfeu sfidën me të cilën po përballet, duke dhënë gjithashtu edhe një mesazh të fortë.
Rrëfimi prekës dhe emocionues i spikeres së lajmeve tashmë është bërë shumë viral në rrjetet sociale. Ajo ndodhej në studion e lajmeve kur kërkoi pak kohë televizive për të treguar se po përgatitet të luftojë me kancerin. Sara u shpreh se është në fazën e tretë të kancerit të gjirit dhe se po vijon kimioterapinë.
“Merrni vetëm një sekondë për të kujtuar emrat e tetë grave që i doni dhe i njihni në jetën tuaj. Vetëm tetë. Numëroni ato me gishta. Statistikisht, njëra prej tyre do të sëmuret ose do të ketë kancer gjiri. Unë jam ajo 1 në 8 në grupin tim të miqve”, tha ajo fillimisht.
Sara shtoi se nuk është sëmurë asnjë ditë në jetën e saj, nuk pi duhan, e megjithatë është me kancer të gjirit.
“Nuk jam sëmurë asnjë ditë në jetën time. Unë nuk pi duhan, pi rrallë. E megjithatë ja ku jam me kancerin e gjirit në fazën e tretë. Është e vështirë të thuash me zë të lartë. Kanceri i gjirit nuk është më një dënim me vdekje për shumicën e grave. Për të gjitha motrat e mia, të bardha të zeza ju lutemi bëni mamografitë tuaja çdo vit”, tha gazetarja e njohur duke mos i fshehur dot sytë e saj të përlotur.
Gazetarja vijon duke thënë se ‘kjo që ndodhi nuk ishte diçka që nuk mund t’a parashikonte kurrë’.
“Po mësoj se pa marrë parasysh se çfarë ferri përjetojmë në jetë, unë jam ende çmendurisht e dashuruar me këtë jetë. Jam më e lumtur sepse nuk stresohem më për gjërat e vogla budallaqe që më mërzitnin. Dhe tani çdo ditë që marr frymë, jam e lumtur që jam akoma gjallë me ju, kolegët e mi, familjen time dhe mund të qeshim, të qajmë dhe të shpresojmë. Dhe kjo miqtë e mi, mjafton”, tha ajo duke qarë.
Pavarësisht diagnozës së saj, Sidner zbuloi se ajo do të shijojë çdo gjë, bukurinë dhe gëzimin në jetë, sepse jeta është shumë e shkurtër.
“Unë po jetoj dhe po dua të jetoj sepse e di që jeta mund të jetë e shkurtër. Unë nuk e di se si do të përfundojë kjo por ne kemi aftësinë të shijojmë çdo moment për sa kohë që marrim frymë”, përfundoi gazetarja e CNN.