Glen Daja mendon se Dinamo ka bërë një ndeshje thuajse perfekte ndaj Elbasanit, po të mos ishte ai gol i pësuar nga një rivënie anësore. Djali i trajnerit Ilir Daja, mori vendin e tij në pankinë sot, për shkak të pezullimit të teknikut të bluve.
“Unë do e ndaja ndeshjen në dy tablo, para të kuqes dhe pas saj. Deri në minutën e 30 ishim dominues dhe po e vinim kundërshtarin shpeshherë në vështirësi. Pas të kuqes, që nuk e mora vesh pse ishte, nuk dua të krijoj alibi që ishte faji i arbitrit apo jo, patëm vështirësi se ishim me 10 lojtarë në fushë. Tentuam të bënim gjithçka për gjithçka e shënonim golin e barazimit.
Edhe kur hyra në dhomat e zhveshjeve pas ndeshjes, u thashë çunave që nëse do shmangnim mënyrën se si pësuam gol, në një rivënie anësore e moment mos përqendrimi, ndeshja ishte perfekt. Kishim edhe rastet tona. Duhet të përshëndes lojën e Vilës se ka bërë shumë mirë fazën e sulmit dhe mbrojtëse. E dinim që kjo ndeshje do kishte agresivitet të lartë dhe tranzicione shumë të forta, ua kishim kërkuar lojtarëve.
Ia vlen të kujtohet që kishim mungesën e Gundo, Nani, Qefalija që nuk luante nga minuta e parë për shkak të gjendjes, mungesa e Alijit që doli me të kuq. Në pjesën e dytë luajtëm me 4-3-2, deri në minutën e 70 ekipi konsumohet, nuk kishim forcën e duhur të sulmonim. Duke bërë zëvendësimet, ekipi u rifreskua, ia arritëm atë që deshëm, por pa realizuar golin që kërkonim.