Egnatia po përgatitet për sezonin e ri me një grup tërësisht të rinovuar. Merkatoja ka sjellë deri tani tetë përforcime, të shpërndara në të gjitha repartet e skuadrës, duke treguar qartë se drejtuesit kanë dashur të mbulojnë çdo boshllëk.
Në krahun e djathtë të sulmit është afruar Kastriot Selmani, ndërsa anën tjetër e mbulon Ildi Gruda, dy sulmuesit e krahut që pritet t’i japin më shumë shpejtësi dhe fantazi ofensivës. Mbrojtja është përforcuar me spanjollin Guillem Jaime në krahun e djathtë, me Jeffersonin në krahun e majtë dhe me qendërmbrojtësin Anio Poçi, duke sjellë më shumë stabilitet në prapavijë. Në mesfushë është shtuar Flamur Ruçi, një profil sulmues që pritet të krijojë lidhjen mes repartit të mesëm dhe sulmit, ndërsa në vijën e parë ka ardhur edhe Nikola Buriç, qendërsulmues që shihet si pikë referimi në zonën rivale. Megjithatë, pavarësisht afrimeve, largimet kanë qenë të shumta.
Nga kampionët janë shkëputur plot dhjetë futbollistë, një shifër që tregon për një rinovim të thellë të grupit. Lojtari i fundit që ka mbyllur marrëdhënien me skuadrën është Guindoja, një element i rëndësishëm që lë një boshllëk të ndjeshëm sidomos në fazën mbrojtëse dhe në ekuilibrin e lojës.
Kështu, panorama e re e kampionëve tregon një skuadër në ndërtim, ku pesha do të bjerë mbi integrimin sa më të shpejtë të afrimeve dhe mbi krijimin e një harmonie të re mes lojtarëve. Sfida kryesore do të jetë ruajtja e identitetit fitues, në një sezon ku presioni për të mbrojtur titullin dhe për të bërë një hap përpara në arenën ndërkombëtare është më i madh se kurrë.