Elena Sadiku do të bëhet trajnerja e parë femër në histori të ekipit të femrave të Celtic, pasi edhe zyrtarisht klubi skocez njoftoi për arritjen e marrëveshjes.Ajo do ta nis aventurën e saj të re me Celtic javën e ardhshme, teksa ka nënshkruar një kontratë dy vjeçare, duke lënë kështu punën tek ekipi i Everton që bën gara në Superligën e femrave.
30-vjeçarja gjatë kohës sa ishte futbolliste aktive ka luajtur për klube nga më të ndryshme si Rosengard, Kristianstad, Eksilstuna United dhe Hammarby, por u detyrua të tërhiqej nga futbolli aktiv në moshën 23-vjeçare për shkak të një dëmtimi.
“Kjo është një ditë e madhe për mua dhe familjen time, t’i bashkohem një klubi si Celtic në një kohë kaq të rëndësishme për ekipin tonë të femrave”, ka thënë Sadiku.
Sadiku e ka filluar karrierën si trajnere në akademinë e vajzave tek Hammarby ku më pas ka kaluar tek kampioni suedez Rosengard.
Ajo ka fituar eksperiencë në Ligën e Kampionëve të Grave gjatë kohës sa ishte në stafin e trajnereve tek ekipi danez Fortuna Hjorring.