Tirana ka arritur të mposht me përmbysje Kukësin në transfertë me rezultatin 2-3, përballje e vlefshme për javën e 22-të të Kategorisë Superiore.Një pjesë e parë me ritëm dhe gola. Në minutën e 15’, Kukësi do të kalonte në avantazh me Mustafa Salam. Tirana do të barazonte shifrat. Goditja nga distanca e Deliut, nuk neutralizohet nga portieri Tafas, me Liridon Latifin që i gjendur në vendin e duhur ia del të barazojë. Kukësi do të kalonte sërish në avantazh, një tjetër aksion model nisur nga krosimi i Muratit, ku në krahun tjetër Dragoshi i harruar e con topin në fundin e rrjetës.
Në pjesën e dytë Kukësi u munda me cdo mjet ti ulte ritmin kundërshtarit, dhe në fakt një situatë e tillë ashtu ndodhi, deri në minutën e 62’, duke detyruar trajnerin e Tiranës, Julian Ahmatajn për të larguar një mesfushor si Jonuzi e duke aktivizuar sulmuesin Patrick. Një lëvizje e tillë rezultoi e zgjuar, sepse Tirana hapet në lojë dhe në minutën e 68’, një harkim i Përgjonit, bën që Dragoshi të prekë topin me dorë.
Për arbitrin Florian Lata nuk ka asnjë dyshim dhe 11-metërsh. Pranë topit shkon Abazaj që ia del të shënojë. Tirana mund t’i kishte bërë një mbyllje më të mirë ndeshjes, nëse Patrick do të shënonte golin e avantazhit, në të 71-tën. Megjithatë sulmuesi brazilian nuk e kishte thënë fjalën e fundit, sepse në të 88-tën, Patrick fiton 11-metërsh në atë faull të shkaktuar nga Dragoshi.
Përsipër e merr 25-vjecari që shënon golin e fitores. Tirana rikthehet kështu te fitorja dhe blindon vendin e parë duke shkuar në kuotën e 33 pikëve. Ndërkohë ardhja e Emiliano Celës, ka rindezur një farë shprese me lojën e zhvilluar, por që për momentin, skuadrës i nevojiten pikë për të shpëtuar një sezon që po shkon drejt dështimit.