Tre ndeshje asnjë gol. Dinamo po kalon një moment të vështirë në kampionat pasi prej tre ndeshjesh nuk ka arritur të gjejë rrugën e rrjetës. Ky bllokim ofensiv ka ndezur sinjalet e alarmit në klubin blu. Në tre përballjet e fundit, ekipi ka treguar disiplinë në mbrojtje, por mungesa e ideve dhe konkretizimit në sulm ka bërë që skuadra të mbetet e parrezikshme në portën kundërshtare.
Sulmuesit kryesorë janë në hije, ndërsa mesfusha shpesh ka munguar në pasimin final. Stafi teknik tashmë është vënë në lëvizje dhe pritet që në ndeshjen e fundit ndaj Tiranës të ketë ndryshime në formacion, më shumë guxim në lojën ofensive dhe ndoshta edhe minuta për lojtarë që deri tani minutazhin e kanë patur të kufizuar. Te Dinamo, largimet e Zabërgjas dhe Itodo Mandelës kanë lënë një boshllëk në sulm, ndërsa Bernard Berisha nuk po arrin dot të hyjë në mekanizmat e Ilir Dajës. Përballja me Tiranën shihet si testi vendimtar për të treguar nëse kjo periudhë e errët është vetëm një episode kalimtar, apo një problem që kërkon ndërhyrje të shpejtë.