Ditën e sotme FSHF-ja ka bërë të ditur axhendën e ndeshjeve të Superiores deri në fundvit. Është mësuar edhe data e ndeshjes së ndërprerë të Egnatias – Partizanit, si dhe të takimeve të tjera të javës së 13-të. Më 23 dhe 24 nëntor skuadrat do të zbresin në fushë për të bërë mes tyre llogaritë e kësaj jave. Kujtojmë se takimi i ndërprerë në Rrogozhinë do të rifillojë në minutën e 25-të, kur edhe u ndërpre për shkak të atakut kardiak që pësoi Raphael Dwamena.
Gjithashtu FSHF-ja ka zbuluar edhe datën kur do të luhet derbi i kryeqytetit mes Tiranës dhe Partizanit. Është vendosur që të zhvillohet më 3 dhjetor në “Air Albania” duke nisur që nga ora 19:00. Ndër të tjera janë bërë publike edhe datat e ndeshjeve deri në fundvit.
Komisioni i Ligave dhe Garave ka përcaktuar edhe ditën dhe orën se kur do të zhvillohet ndeshja e prapambetur mes Partizanit dhe Teutës. Takimi do të luhet më datë 7 dhjetor në orën 17:00.