Vllaznia ka vetëm një rrugë për të ngritur trofeun këtë sezon, por ironia më e madhe është se fati i saj tashmë kalon nga Dinamo e Ilir Dajës, trajneri me të cilin Edi Martini ka pasur jo pak tensione gjatë sezonit.
Kuqeblutë nuk kanë asnjë interes te sfida e sotme mes Elbasanit dhe Dinamos, pasi gjithçka do të vendoset në javën e fundit të Final Four. Për Vllazninë ekziston vetëm një kombinim rezultatesh që e shpall kampione: fitorja ndaj Elbasanit dhe një triumf i Dinamos përballë Egnatias.
Nëse ndodh ndryshe, titulli largohet përfundimisht nga Shkodra. Egnatia mbetet skuadra më e favorizuar, pasi e ka vetë në dorë fatin e saj dhe mjafton të mos humbasë ndaj Dinamos për të ruajtur kreun. Paradoksi i këtij sezoni është i madh. Vllaznia e mbylli kampionatin e rregullt me 6 pikë më shumë se Egnatia, por në Final Four gjithçka u përmbys dhe tani rrogozhinasit janë 3 pikë përpara.
Ndërkohë, sfida e fundit sjell edhe një “armëpushim” të detyruar mes Dajës dhe Martinit, të cilët gjatë sezonit nuk i kanë kursyer thumbat ndaj njëri-tjetrit në distancë. Tashmë, për herë të parë, Vllaznia detyrohet të bëjë tifozllëk pikërisht për Dinamon e Ilir Dajës.