Sezoni i shkuar nuk ishte në nivelin e pritur për Vllazninë. Edhe pse pati ndryshime në stafin teknik, kuqeblutë ishin shumë larg pritshmërive. Megjithatë ia dolën të zinin një vend për Kupat e Europës ku shorti i përballi me Linfild.
Dje, kuqeblutë fituan 1-0 në “Loro Boriçi”, por goli i vetëm nuk mjaftoi për t’i çuar në turin e dytë të Conference League. Humbja 3-1 në sfidën e parë, bëri që skuadra e Migen Memellit të mbyllte këtu rrugëtimin në Kupat e Europës.
Mirëpo, drejtuesit mund të ngushëllohen me faktin se kanë arritur të grumbullojnë 250 mijë euro. Kualifikimi për në Conference League vlen sa shifra e mësipërme. Ndoshta nuk mund të përmbushë harxhimet për një sezon futbollistik, por mund të ndihmojë sadopak shkodranët për të pasuruar klubin me ndonjë element cilësorë.