Me rastin e Ditës Botërore të të Sëmurit, kardinali Peter Turkson komenton fushatën e vaksinimit, në vijim. “Tani – vëren – shqetësimi lidhet edhe me cilësinë e vaksinave, sepse në vende të ndryshme të globit po arrijnë prodhime të ardhura nga Kina, Rusia e India, përdorimi i të cilave krijon shumë dyshime lidhur me efektshmërinë e tyre”. Prefekti i dikasterit për Zhvillimin e Gjithanshëm Njerëzor reflekton për situatat që krijohen në vendet më pak të zhvilluara: “Jugu i botës – kujton – jeton me kokën e kthyer gjithnjë nga veriu, prej nga shpreson t’i vijnë vaksinat, duke harruar se mund t’i prodhojë edhe në vendet e veta”.
Problem, që lidhet me sigurinë globale.
Ky sistem nuk mund të pranohet më – shton Hirësia e Tij – që, në vijim kërkon ndërhyrjen e organizmave ndërkombëtare, duke nisur nga Këshilli i Sigurimit të OKB-së, e duke kujtuar thirrjen e bërë së bashku me kryetarin e Caritas Internationalis, kardinalin Luis Antonio Tagle:
“Ka ardhur koha që Pallati i Qelqit të merret me këtë problem, duke pasur parasysh se tashmë është çështje që ka të bëjë me sigurinë globale. Por edhe Organizata Botërore e Tregtisë mund të luajë rolin e saj për të lehtësuar hallkat e pronësisë intelektuale lidhur me ilaçet. Kjo praktikë – nënvizon – përbën një pengesë serioze për prodhimin e vaksinave në vende të ndryshme nga ata, që aktualisht i kanë patentat”.
Virusi dhe ilaçet natyrore.
Kardinali beson në aftësitë e “Afrikës së tij”. Në disa vende të Kontinentit – tregon – ka laboratore të afta për ta vënë në qarkullim vaksinën, duke lehtësuar përdorimin e saj universal, të dëshiruar nga Papa. Po ka edhe më! Ka realitete aktive në frontin e përdorimit të ilaçeve natyrore, që mund të ndihmojnë shumë në mjekimin – e mundjen e virusit. Turkson kujton posaçërisht rastin e Senegalit, ku një ilaç i tillë u përdor me sukses, duke shpëtuar mijëra jetë njerëzore. “Asnjë vdekje!” – saktëson, duke kujtuar se edhe në Gjermani ka struktura që punojnë në këtë drejtim. Prej këndej, pohimi: “Po shikojmë nëse është e mundur t’i porosisim këto prodhime për t’i çuar në vende ku vaksina nuk mund të arrijë në kohën e duhur”.
Një dokument për shëndetin mendor.
Ndërkaq Komisioni vatikanas Covid-19, i ngritur sipas dëshirës së Papës, nën udhëheqjen e kardinalit Turkson, po shikon me shqetësim ndikimet e pandemisë mbi shëndetin e mendor të njerëzve. E shqetësimi është aq i madh, sa të hartohet një dokument i përqendruar tërësisht mbi bashkëjetesën në hapësirat shtëpijake, në kohën e emergjencës shëndetësore. “Është dokument baritor, me qëllim shoqërimi – saktëson Hirësia e Tij – që synon t’i inkurajojë njerëzit, të cilët vuajnë psikisht për shkak të pandemisë, si dhe ata, që i kujdesin”. Çka pason sëmundjen është se pamundësia për të dalë, posaçërisht kur familja nuk ka shumë burime kulturore e materiale, krijon shpesh tensione, agresivitet e, nganjëherë, edhe forma të dhunës”.