Trump për zgjedhjet e nëntorit: “Nuk e di nëse do ta pranoja humbjen në zgjedhjet presidenciale”

Presidenti i Shteteve të Bashkuara, Donald Trump, ka refuzuar të thotë nëse do të pranojë rezultatin e zgjedhjeve presidenciale, që do të mbahen në nëntor në SHBA. “Do ta shoh….Më duhet të shoh”, tha Trump në një intervistë me televizionin Fox News. Ai tha se është shumë herët për të dhënë garanci të tillë. Demokrati, Joe Biden, udhëheq ndaj Trumpit me 15 për qind mes votuesve të regjistruar në SHBA dhe mban një epërsi prej 20 pikësh kur bëhet fjalë për besimin të cilin amerikanët e kanë për të trajtuar pandeminë e koronavirusit, thuhet në një sondazh të realizuar nga ABC News/Washington Post të publikuar më 19 korrik. Por, Trump i ka hedhur poshtë rezultatet e disa sondazheve të fundit, të cilat tregojne se po bie popullariteti ndaj tij dhe që Biden po mban një epërsi. Trump i ka cilësuar si të gabuara këto sondazhe. “Para së gjithash, unë nuk po humb sepse ato janë sondazhe të rreme”, tha Trump gjatë intervistës. “Ato ishin false në vitin 2016 dhe tani ata janë edhe më të rreme”, tha ai. Presidenti Trump tha se beson se votuesit republikanë nuk janë të përfaqësuar në sondazhe të tilla. Popullariteti i Trumpit vlerësohet se ka shënuar rënie për shkak të përgjigjes së tij ndaj pandemisë së koronavirusit si dhe pas protestave mbarëkombëtare që shpërthyen pas vdekjes së Georde Floyd në Minneapolis, ndersa arrestohej nga një polic i bardhë.