Tirana e sezonit të ri do të ketë tjetër fytyrë. Këtë e kanë treguar edhe largimet, që do të pasohen me zyrtarizime.
Gledi Mici, Gentian Selmani dhe Erisildo Smaçi janë zyrtarisht të lirë. Më parë klubi ka njoftuar largimet e Përgjonit, Prengajt, Bajroviçit, Harizajt dhe Ndrecës.
Tirana ia doli me mjaft vështirësi të mbijetonte në Superiore. Për këtë largimet ishin të pritshme, ndërsa ekipi zbret nesër në fushën e lojës.
Tirana prej disa ditësh është pa trajner. Largimi i Bledi Shkëmbit ka lënë një boshllëk të madh në ekip pak ditë para se të nisë faza përgatitore. Emrat e përfolur për të drejtuar Tiranën janë disa. Duke filluar nga Shpëtim Duro e deri te Qatip Osmani. Një listë e gjatë kandidatësh, por që ende nuk ka prodhuar një emër konkret. Me shumë mundësi, java që vjen do të jetë vendimtare për stolin e Tiranës. Trajneri duhet të emërohet sa më shpejt, pasi nuk ka kohë nëse dëshiron që të ketë një skuadër gati.
Tirana do të jetë pushim pas dy sezonesh, ndonëse në dy të fundit ka bërë mirë në Europë. Për të gjetur një sezon pa Europë, duhet të kthehemi në 2021-2022. Tirana e atij kampionati e humbi vendin europian në ndeshjen e fundit ndaj Laçit.