Tirana e Partizani, rivalët miq-armiq të një jete, takohen për herë të tretë në këtë sezon në një derbi të zjarrtë. Kryeqyteti nuk e ka ende një dominues, pavarësisht se të kuqtë janë në zonën e Final-Four dhe bardheblutë janë në pozita të vështira. Për tifozët duhet fituar derbi dhe pas dy ndeshjeve 0-0 është koha që dikush të ushtrojë pushtetin duke rrëmbyer suksesin.
Tirana do të luajë këtë të diel derbin e shumëpritur përballë Partizanit, ndeshje që do zhvillohet në kuadër të javës së 24-të të Superiores. Sfida që do të luhet në stadiumin “Arena e Demave”, nis në orën 13:30.
Ndërkohë që shumë pak ditë para derbit, tifozët bardheblu duke nisur me provokime të shumta. “Tirona Fanatics” këtë herë ka vendosur nëpër rrugicat e kryeqytetit disa lajmërime vdekje, ku njoftohej se klubi i Partizanit nuk jeton më.
“Të dielën do vijm me ju bo qokën!”, shkruajnë Fanaticsat në rrjetet sociale krah lajmërimeve të vdekjes. Në “Arenën e Demave” pritet spektakël jo vetëm në fushë, por padyshim edhe në tribuna.
PRECEDENTËT
Partizani vjen nga dy barazime radhazi dhe nuk humb në derbin me Tiranën që nga dhjetori i vitit 2022, duke qëndruar të pamposhtur në 9 ndeshje ndërqytetase. Bledi Shkëmbi pasi ndaloi rënien dhe mori 4 pikë në dy ndeshjet në detyrë kërkon tani të kthejë besimin te lojtarët e tij, aspak ekspertë në ndeshje të tilla, por grintozë dhe me dëshirën për të ndryshuar fatet e këtij sezoni.