Humbja ndaj Vllaznisë javën e kaluar është thjesht një kujtim i largët për Skënderbeun. Në javën e 28-të të kampionatit shqiptar, ekipi korçar ka fituar 2-0 ndaj Egnatias duke blinduar kështu vendin e katërt, pozicion që të çon në “Final-Four”. Në minutën e 20’ pas një goditje nga këndi, topi mbetet në zonë ku Franklin gjuan me forcë për të mposhtur Sherrin.
Avantazhi i dha zemër Skënderbeut, pasi në minutën e 39’ do të ishte përsëri Franklin ai i cili çon sferën në rrjetë. Në pjesën e dytë, Egnatia u mundua të reagonte me tentativat e Montenegros, apo Zejnullahit, por pa mundur dot të shënonin. Me këtë fitore, Skënderbeu shkon në kuotën e 40 pikëve, ndërsa Egnatia vazhdon të ketë probleme me rezutlatet, duke e çuar në 6 ndeshje radhazi pa fitore, dhe tani ka rrezik të humbasë vendin e parë, nëse Vllaznia ia del të fitojë ndaj Kukësit.