Kombëtarja shqiptare ka reaguar pas humbjes ndaj Republikës Çeke në Pragë dy ditë më parë. Kuqezinjtë kanë marrë një fitore mjaft të rëndësishme në transfertën e Gjeorgjisë. Sfida e zhvilluar në Tbilisi, përfundoi 0-1 në favor të Shqipërisë.
Një pjesë e parë mjaft e mirë për Kombëtaren tonë, me sinjalet pozitive që erdhën në disa raste me Indrit Tucin. Megjithatë, fraksioni i parë i kësaj ndeshje përfundoi pa gola.
Me nisjen e pjesës së dytë, Kombëtarja kuqezi u bë më kërkuese duke gjetur golin. Në minutën e 48-të, pas një aksioni model nga Nedim Bajrami, Indrit Tuci dhe Kristjan Asllani, ishte ky i fundit që i dha goditjen “finale” topit, duke e dërguar në fundin e rrjetës së portës së mbrojtur nga Mamardashvili.
Pas këtij goli të shënuar, Shqipëria u tërhoq disi duke u mbrojtur mjaft mirë dhe duke mbyllur çdo hapësirë. Me këtë fitore, kuqezinjtë mbeten në vendin e 3-të, por në kuotën e 6 pikëve, aq sa Gjeorgjia dhe Çekia, me këta të fundit që kanë një ndeshje më pak.