Kombëtarja shqiptare e futbollit është kthyer sot përsëri në fushën sërvitore, një ditë pas ndeshjes kundër Çekisë. Dhe duket se lista e trajnerit Silvinjo për ndeshjen e radhës, miqësoren kundër Bullgarisë, do të pësojë ndryshime.
FSHF ka bërë të ditur se Mirlind Daku ka pësuar një dëmtim muskulor dh pas kontrolleve të hollësishme mjekësore, është kuptuar që do i nevojiteshin disa ditë pushim për rikuperimin. Kështu, meqë lojtari nuk mund të jetë i gatshëm për sfidën ndaj Bullgarisë, ai është lënë i lirë të kthehet pranë klubit të tij.
E njëjta situatë edhe për Keidi Baren, i cili do të udhëtojë drejt Spanjës për t’iu bashkuar Espanjolit. Klubi ka bërë kërkesë zyrtare në FSHF që mesfushor të lihet i lirë për të luajtur një ndeshje të rëndësishme këtë javë në La Liga 2 dhe stafi teknik i ka dhënë leje lojtarit.
Tani mbetet që të shihet nëse do të ketë afrime të tjera në radhët e kuqezinjve për duelin ndaj Bullgarisë, pasi lista është reduktuar për shkak të dëmtimeve dhe këtyre largimeve në vetëm 21 lojtarë.