Skënderbeu po përgatit sfidën e radhës ndaj Partizanit në transfertë, një ndeshje e cila është tejet delikate dhe e vështirë për korçarët. Me sulmin thuajse të boshatisur dhe në transfertën e kryeqytetit, korçarët sërish do të kërkojnë pikët e plota, si një objektiv që shoqëron Skënderbeun në çdo ndeshje. Gresild Lika, sulmuesi i cili është rritur te akademia e Partizanit ka sfiduar skuadrën e kuqe.
“Unë jam rritur te Partizani dhe mund të them se kam mësuar nga shkolla e Partizanit përsa i përket futbollit. Tani jam në një ambient tjetër dhe ndihem mirë këtu. Do të jetë një lloj derbi për mua dhe normalisht që dua ta luaj. Unë i jam mirënjohës Partizanit për sa ka bërë për rritjen time. Do të jetë një ndeshje e veçantë për mua, por jo një “hakmarrje”. Skënderbeu në çdo ndeshje ka si objektiv maksimal fitoren dhe gjithmonë hyjmë në fushë vetëm për të fituar.