Ditën e enjte në orën 16:00, do të luhen dy takimet e fundit të Play-Outit në Kategorinë e Parë. Dy sfida që do të vendosin shumë për fatet e dy skuadrave. Në Arena Egnatia të Rrogozhinës do të luhet takimi mes Lushnjes dhe Ilirisë. Ekipi drejtuar nga Gugash Magani e mbylli sezonin në vendin e 9-të në kuotën e 38 pikëve, vetëm dy pikë më pak se zona e shpëtimit.
Nuk është një sfidë e lehtë për lagunarët, që përballë do të jetë ekipi nga Fushë-Kruja me një trajner ekspert si Agim Canaj që e njeh ambjentin e Lushnjes pasi e ka drejtuar më parë. Besa drejtuar nga Dorian Bubeqi do të luajë në stadiumin Flamurtari të Vlorës ndaj Luftëtarit. Një ndeshje ku nuk ka favoritë me dy skuadrat që kërkojnë me patjetër të mos dështojnë në sprintin final të sezonit.