Kryeministri Edi Rama u është drejtuar me një ftesë të rinjve dhe të rejave që duan një mundësi për veten, familjen dhe atdheun të bëhen pjesë e Forcave të Armatosura të Republikës së Shqipërisë.
Numri një i qeverisë, ka rikujtuar rritjen e pagave me 30% në vitin 2022 dhe me 7% këtë vit dhe një tjetër rritje e konsiderueshme deri në 22% do të bëhet realitet në 2024.
“NJË FTESË për të gjithë të rinjtë e të rejat, që ta shohin si një mundësi të re për veten, familjen po edhe atdheun, afrimin e tyre me Forcat e Armatosura të Republikës sonë.
Pas rritjes së pagave me 30% në vitin 2022 dhe me 7% këtë vit, një tjetër rritje e konsiderueshme deri në 22% do të bëhet realitet në 2024, për të gjithë ushtarakët e Forcave të Armatosura të Shqipërisë.
Respekt për punën e vajzave dhe djemve në uniformë, pjesë e vijës së parë të frontit në mbrojtje të territorit të vendit”, shkruan Rama.