Në një përballje të fortë dhe me shumë emocione, Partizani arriti të marrë tre pikë të vlefshme në transfertë ndaj Flamurtarit, duke fituar me rezultatin minimal 0-1 në stadiumin e Vlorës.
Pjesa e parë foli për një ndeshje të ekuilibruar, ku të dy skuadrat kërkuan me ngulm avantazhin, por pa shumë raste të pastra për shënim. Flamurtari u tregua këmbëngulës në krahë, ndërsa Partizani u përpoq të kontrollonte lojën në mesfushë.
Goli i vetëm i takimit erdhi në minutën 63′ të pjesës së dytë, pas një aksioni të kuq të Partizanit. Një top i futur në zonë u devijua në mënyrë të pafat nga Trashi, që e çoi topin në rrjetën e portës së vet, autogol që i dha avantazhin skuadrës kryeqytetase.
Flamurtari u hodh menjëherë në sulm për të barazuar rezultatin dhe besoi se e arriti këtë në minutat e fundit, kur Maksuti dërgoi topin në rrjetë. Megjithatë, gëzimi zgjati pak, pasi sistemi VAR anuloi golin për një prekje me dorë të sulmuesit .
Përfundimisht, ndeshja u mbyll me fitoren minimale të Partizanit, që merr frymëmarrje dhe largohet disi nga zona e ftohtë, ndërsa ardhja e Morieros te Flamurtari nuk ndryshoi asgjë me ekipin vlonjat që mbyll klasifikimin.