Sandro Tonali cilësohet si një nga talentet më të mëdha të futbollit italian dhe jo më kot klube si Interi e Juventusi, por edhe PSG e Barcelona në Europë, janë vënë në garë për të marrë shërbimet e tij.
Aktualisht në pronësi të Brescias, Tonali pritet të bëjë hapin e madh në fund të këtij sezoni, ndërsa presidenti i “Dallëndysheve” Massimo Cellino e vlerëson futbollistin me shifrën e 50 milionë eurove.
Vetë mesfushori, në një intervistë të dhënë për “Sportweek” deklaroi se i ka idetë e qarta dhe se synon të arrijë majën e botës, por pranoi se për t’ia dalë, do t’i duhet të sakrifikojë edhe shumë më tepër sesa ka bërë deri tani.
“E di që mund të arrij në majën e botës, por për këtë do të më duhet të sakrifikoj shumë më tepër nga sa kam bërë. Më krahasojnë me Pirlon, por nuk jam pasardhësi i tij. Ai kishte një pas të gjatë të jashtëzakonshëm, që unë nuk e kam ende, por jam i ndërgjegjshëm që më duhet të punoj shumë, që të arrij objektivat e mi”, deklaroi ndër të tjera futbollisti.
Në Itali këmbëngulin se Interi është në avantazh për të marrë shërbimet e mesfushorit, që u komplimentua në media edhe nga Drejtori Sportiv i zikaltërve Piero Ausilio, ndërsa marrëveshja mund të arrihet për shifrën e 40 milionë eurove dhe një ose dy të rinjve në këmbim.