Mladen Milinkoviç ka folur para ndeshjes Partizani-Teuta, që do të luhet nesër në “Arena e Demave” prej orës 20:00.
Para ndeshjes, Milinkoviç deklaroi:
“Gjendja e skuadrës? Çfarë ishte e rëndësishme për ne ndeshjen e parë, morëm 3 pikë. Dhe menjëherë filluam të përgatitemi për ndeshjen e radhës. Gjatë kësaj jave të gjithë lojtarët ishin të gatshëm. Nëse pyet për Bintsukën, është në formë më të mirë tani. Gjatë kësaj kohe kishte humbur përgatitjet, ndoshta mund të jetë nesër me skuadrën.
Me Vorën? Nuk besoj se ishim nervozë. Nga minuta e parë në pjesën e dytë i lamë të luajnë dhe na vendosën në presion. Krijuan raste të mira për të shënuar. Nuk më pëlqen që skuadra të luajë në këtë mënyrë sigurisht, kështu që do provojmë në ndeshjen tjetër të jemi më të mirë dhe të mbajmë ritmin e pjesës së parë. Sigurisht që nuk jemi në momentin më të mirë, është akoma fillimi. Shpresoj se pas pushimit do jemi shumë më mirë. Kjo është diçka që duhet ta mendojmë pas ndeshjes, tani duhet të kemi gjithë fokusin te ndeshja e nesërme dhe të mundohemi të marrim 3 pikët. Më pas të mendojmë për gjithë gjërat e tjera.
Ka shumë lojtarë që janë me ne. Zakonisht në stërvitje janë 25-26 dhe 5-6 shumë të talentuar, por duhet të jesh shumë i durueshëm me ta. Më pëlqen të punoj me lojtarë të rinj, t’u jap mundësi, por çdo gjë duhet të vijë me kohën. Për momentin janë me ne, por disa prej tyre si Qokthi që mori mundësinë, të gjithë do e kenë një mundësi gjatë vitit për të treguar veten. Janë e ardhmja, thjesht e përsëris që nuk mund të ushtrosh shumë presion tek ata dhe nuk mund të presësh sepse janë të rinj. Kemi kohë, dhe besojmë tek ata. Besoj se disa, nëse jo këtë sezon, në tjetrin do jenë shumë të rëndësishëm për Partizanin.
Teuta? Nuk luajtën në ndeshjen e parë, ndeshjen e fundit e patën rreth 2 javë më parë. Kanë ndryshuar shumë lojtarë. Me informacionin që kemi, kanë lojtarë shumë të mirë. Pyetja është nëse janë kompakt, por nuk pres ndeshje të lehtë. Shumë lojtarë nga sezoni i ri dhe ato që kanë ardhur kanë kualitet. Ndoshta kanë pak avantazh sepse na panë neve. Besoj te lojtarët tonë dhe do jenë në nivel të mirë dhe do kërkojnë 3 pikë si me Vorën. Dhe shpresojmë të gjithë për më të mirën”, u shpreh trajneri i Partizanit.