Partizani do të presë Kukësin në “Arenën e Demave” për të zhvilluar ndeshjen e javës së 8-të të Abissnet Superiores, të dielën në orën 18:00.
Të kuqtë vijojnë përgatitjet nën drejtimin e trajnerit Zoran Zekic i cili ka shumë dilema në kokën e tij. Për të mos folur për çështjen Osijek, fokusohemi tek e tashmja që është ‘Kukësi’. Trajneri kroat duhet të zgjidhë dilemat e formacionit titullar teksa dëmtimet e kushtëzojnë sërish, por kësaj rradhe pritet të mungojë ylli më i shndritshëm i skuadrës, Arinaldo Rrapaj i cili ashtu si Hadroj, ka një shqetësim që me shumë mundësi do t’i lërë të dy jashtë fushës.
Porta dhe mbrojtja qëndroj e njëjta me ndeshjet e fundit ndërsa në mesin e fushës rikthehet Valentino Murataj që pritet të jetë mes dyshes Mehmeti – Maguette. Trekuartisti është balotazh mes Taipit dhe Da Silvas me brazilianin favorit ndërsa në sulm Mba ose Bintsouka do t’i bashkohen Tedi Carës.