Ernest Gjoka mbylli aventurën e tij në Arabi dhe tashmë është rikthyer në Shqipëri ku po shijon pushimet. Në një intervistë për emisionin “Panorama Sport”, tekniku kryeqytetas ka folur për derbin Tirana-Partizani dhe është ndalur te e ardhmja e tij.
“Janë dy skuadra për një titull. Nëse i shohim me kujdes, Partizani është në moment të mirë psikologjik dhe me skuadër të plotësuar. Disavantazhi është që Partizanit i duhet patjetër ndeshja dhe kjo e bën të gabojë. Tirana ka disavantazh humbjen e lojtarëve në një pikë kyçe të sezonit dhe bëhet e vështirë. Jemi një kampionat modest dhe nuk kemi shumë cilësi. Ato 2 që kemi duhet t’i mbajmë mirë.”
Më pas tekniku foli edhe për të ardhmen, 53-vjeçari i hap dyert një rikthimi në Kategorinë Superiore.
“Për momentin jam pushim. Erdha nga një eksperiencë e madhe në Arabi. Është treg i madh dhe donte që klubi të mbijetonte. Ishim 18 trajnerë nga e gjithë bota. Vetëm 2 shqiptarë ishim atje, unë dhe Cikalleshi. U bënë 3 vjet që nuk jam në Superligë. Janë bërë shumë ndeshje në Europë e Ballkan apo Arabi. Mund të vijë një moment që një ekip të ketë nevojë për këtë eksperiencë. Do të pranoja oferta. Jam trajner i dalë nga Superiorja dhe eksperiencën që e marrim duhet ta sjellim në Shqipëri. Këtë përvojë që po marrim duhet ta sjellim”, përfundon trajneri.