Teksa kanë kaluar thuajse dy javë nga vrasja e Liridona Ademajt, kjo ngjarje vijon të mbetet në vëmendje.
Përveç detajeve që tronditën opinionin, pasi u zbulua se Naim Murseli kishte porositur vrasjen e bashkëshortes së tij, i rëndë mbetet fakti se mes dy familjeve po përmendet Kanuni dhe marrja e hakut për vdekje të 30-vjeçares.
Në një prononcim për media babai i Naimit, Shaban Murseli, deklaroi se është vizituar nga pjesëtarë të familjes Ademaj, të cilët i kanë thënë se kanë përfunduar ditët e besës. Ai nënvizon se ka lajmëruar policinë dhe banesa e tij ruhet nga dy patrulla të policisë.
Por një deklaratë e tillë është mohuar nga vëllai i Liridonës, i cili ka deklaruar se kjo gjë është e pavërtetë dhe se nëse kishin dashur ta bënin diçka të tillë, do e bënin ditë më parë. Leonard Ademaj deklaroi sërish se zgjidhjen e çështjes ia kanë lënë organeve të drejtësisë së Kosovës.
“Më babanë edhe vëllaun e kemi përmend se kemi me folë që mos me na dalë ma përpara. Gjakova është e vogël dhe mundemi me u përpjekë në ta. Për këtë arsye kanë çu njerëz, që mos me u përpjekë në ta. Vetëm që ata mos me na dalë përpara. Nëse jemi gjaknxehtë, vjen edhe deri te më e keqja. Ne besojmë në drejtësi, s’kam çka them unë për Kanun. Sikur deri tash që ua kemi lanë autoriteteve, edhe tash atyre ua lajmë” ka thënë Leonardi.