Marko Juric vazhdon të jetë një mungesë te Vllaznia. Kroati nuk është në planet e stafit të shkodranëve dhe në këto kushte nuk llogaritet si pjesë kyçe e kuqebluve.
Thomas Brdaric e konsideron një zëvendësues të 3-të dhe minutat për të janë minimale dhe në këto kushte mbrojtësi duket gjithmonë e më larg Shkodrës. Ardhja e Repajt dhe forma e mirë fizike që ka Bajrami kanë bërë që drejtuesit të fokusohen tek kjo dyshe, duke spostuar kështu kroatin.
Juric e ka humbur tashmë vendin e tij në formacionin e kuqebluve. Kujtojmë se 30-vjeçari është bërë pjesë e shkodranëve në verën e vitit 2022 dhe pas 2 vitesh e gjysmë mund të ndajë rrugët me kuqeblutë.
HUMBJA NDAJ EGNATIAS DHE POLEMIKAT
Egnatia ka rimarrë kreun e renditjes të Kategorisë Superiore, duke mposhtur 0-2 Vllazninë në Loro Borici e duke përfituar nga barazimi i një ditë më parë i Partizanit e Dinamos. Një ndeshje e vendosur nga penalltia e Lushkjas dhe goli i Zejnullait, por që ka tërbuar shkodranët për dy episode penalltish, që kanë shkaktuar polemika të forta.