Sinisa Mihajlovic ka ndërruar jetë nga leucemia në moshën 53-vjeçare në një spital në Romë. Ish-trajneri i Milanit dhe shumë skuadrave të tjera në Itali bëri me dije në korrik 2019 se kishte zbuluar se vuante nga sëmundja e leucemisë.
Mihajloviç luftoi për tre vite me radhë, duke drejtuar ekipin e Bolonjës edhe ndërsa i nënshtrohej kurave apo ishte i shtruar në spital. Por në fund nuk ia doli, pasi sot u bë e ditur se ishte ndarë nga jeta i rrethuar nga të afërmit e tij në një spital në Romë ku kishte kaluar ditët e fundit.
Në fakt, lajmi për përkeqësimin e gjendjes së tij shëndetësore ishte përhapur pak ditë më parë, por pakkush dinte situatën reale të ish-futbollistit i cili nisi karrierën te Vojvodina, për të kaluar te Crvena Zvezda, Roma, Sampdoria, Lacio e Inter. Më pas një karrierë si ndihmës i Mançinit të Interi, para se të shkonte te Bolonja e me radhë Katania, Fiorentina, Sampdoria, Milan, Torino dhe në fund përsëri Bolonja, ku ishte në detyrë deri pak muaj më parë.