Orges Shehi mendon se skuadra e tij vazhdon të bëjë hapa para dhe ka dhenë sinjale reagimi pas humbjes së pak ditëve më parë. Trajneri i Partizanit ka theksuar se i ka kërkuar lojtarëve të shohin situatat më me pozitivitet teksa ekipi bëhet gati për pjesën e rëndësishme të kampionatit që i afrohet në “Final Four”.
“Skuadrës i kam thënë që sot duhej skuadër krenare, ka arritur gjithçka mirë, duhet të jenë krenarë për trofetë e derbit që kanë fituar. Duhet të shohin çdo gjë me pozitivitet, normale që në futboll ka ditë të mira e të këqija. Ishte fitore e rëndësishme edhe pse luanim ndaj një kundërshtari të vendit të fundit, por kemi thënë që diferencat janë të vogla sidomos në agresivitetin dhe presionin që aplikojnë skuadrat në kampionatin tonë. Kjo fazë është e rëndësishme për “Final Four”. Nuk qajmë çfarë ka ikur, por të jemi pozitiv e mendojmë për të nesërmen që vjen shumë shpejt”, tha Shehi për “MCN” pas ndeshjes.