Ditën e mërkurë do të zhvillohen ndeshjet e fazës së 1/8-tave të Kupës së Shqipërisë, përballje që do të luhen në orën 13:00 dhe 17:00.Të gjitha takimet do të luhen me vetëm një takim dhe skuadrat që do të kualifikohen për në çerekfinale do të vendosen të mërkurën.
Në orën 13:00 do të luhen gjashtë takime. Egnatia do të sfidojë Lushnjen, ndërsa Partizani do të përballet me Apoloninë. Tirana në këtë fazë ka si kundërshtarë Korabin, ndërsa një takim i fortë është ai mes dy skuadrave të Superiores si Laçi-Dinamo.
Në të njëjtën orë do të luhen edhe dy sfida të tjera që premtojnë spektakël, Kukësi – AF Elbasani dhe Erzeni – Bylis. Dy sfidat e tjera të Kupës së Shqipërisë do të startojnë në orën 17:00. Vllaznia do të përballet me Flamurtarin, ndërsa Teuta do të luajë ndaj Skënderbeut.