Kombëtarja shqiptare udhëtoi këtë të mërkurë drejt Londrës në kuadër të ndeshjes së parë kualifikuese për Kupën e Botës ndaj Anglisë, që luhet të premten më 21 mars, në “Wembley Stadium” në orën 20:45.
Departamenti i Komunikimit në FSHF bën me dije se me skuadrën kanë udhëtuar të gjithë lojtarët e grumbulluar. Me të mbërritur në Londër, kuqezinjtë u akomoduan menjëherë në hotel.
Nesër Kombëtarja do të mbyllë përgatitjet për ndeshjen ndaj Anglisë. Kuqezinjtë do të zhvillojnë seancën zyrtare stërvitore në orën 19:00 në “Wembley Stadium”, ndërkohë që para seancës stërvitore trajneri Sylvinho dhe një lojtar do të jenë në konferencën zyrtare për shtyp, në orën 18:15.
ARDIAN ISMAJLI MUNGESA KRYESORE
Ardian Ismajli do të mungojë përballë Anglisë. Mbrojtësi kuqezi nuk do të jetë i gatshëm për sfidën e 21 marsit që do të zhvillohet në stadiumin “Wembley”, e vlefshme për kualifikueset e Botërorit 2026.
Ismajli u stërvit dje dhe sot i veçuar nga pjesa tjetër e grupit, duke “frikësuar” si fillim një mungesë të mundshme. Por pas testeve mjekësore u vendos se qendërmbrojtësi i Empolit nuk ishte i gatshëm për këtë sfidë.
Një lajm tepër i keq për kuqezinjtë, të cilët humbasin një lider të repartit difensiv. Por nuk mbyllet me kaq, pasi probleme fizike ka shfaqur dhe mbrojtësi tjetër, Marash Kumbulla. Megjithatë, për këtë të fundit ende nuk ka një vendim përsa i përket gatishmërisë.