Kombëtarja shqiptare ka kryer pasditen e sotme seancën e parë stërvitore në ambientet e “Shtëpisë së Futbollit” në kuadër të ndeshjeve ndaj Anglisë dhe Andorrës. Departamenti i Komunikimit në FSHF bën me dije se të 26 lojtarët e grumbulluar janë bashkuar me ekipin. Të fundit që mbërritën në grumbullim u bashkuan me skuadrën gjatë seancës stërvitore.
Ndërkohë, trajneri Silvinjo kishte grumbulluar edhe disa lojtarë nga kampionati “Abissnet Superiore” për seancën e sotme stërvitore. Stërvitja u kombinua mes punës në palestër dhe në fushë. Silvinjo ka plotësuar grupin në stërvitje, me lojtarë që nuk kanë ftesë zyrtare për sfidat e marsit. Aktualisht nën urdhërat e Silvinjos janë Rrok Toma, Ysni Ismaili, Aldi Gjumsi dhe Altin Bytyçi, Denis Sulo, Antonio Delaj, Renaldo Torraj, Jord Çelkupa, Sergio Kalaj dhe Devit Demirçani.
Seanca e radhës stërvitore e Kombëtares do të zhvillohet nesër në “Shtëpinë e Futbollit”. Të mërkurën, ekipi do të udhëtojë drejt Londrës, ku të premten Kombëtarja do të luajë ndeshjen e parë kualifikuese për Kupën e Botës 2026 ndaj Anglisë në “Wembley”.
Rrok Toma(Teuta)
Ysni Ismaili(Vora)
Aldi Gjumsi(Tirana)
Altin Bytyçi(Partizani)
Denis Sulo(Partizani)
Antonio Delaj(Vllaznia)
Renaldo Torraj(Teuta)
Sergio Kalaj(Frosinone)
Devit Demirçani(Teuta)
Jord Çelkupa(Dinamo)