Jordi Jaku me shumë mundësi do të jetë shitja e Tiranës në këtë merkato janari. Bardheblutë janë duke u marrë vesh me klubin italian të Bolonjës që të transferojnë lojtarin përtej Adriatikut. Prej kohësh po diskutohet një kalim i mesfushorit, ndërsa diskutimet janë te detajet. Bolonjezët kanë bërë një ofertë dhe presin fjalën e bardhebluve. Për t’u parë se kur do të bëhet marrëveshja mes palëve. Në fakt, Jaku u aktivizua titullar në takimet e fundit me bardheblutë.
Jordi Jaku është një nga lojtarët me objektiv shitjen. Futbollisti ka vlerën 200 mijë euro dhe është vetëm 18 vjeç. Ka dy sezone te bardheblutë, duke u aktivizuar 473 minuta në 15 takime. Luan si mesfushor i avancuar dhe me parë ka qenë pjesë e Dinamos.
JONUZI – Klubi i Tiranës zyrtarizoi në ditën e fundit të vitit 2024, ndërprerjen e kontratës me mesfushorin Fjoart Jonuzi. Lojtari në këtë edicion të dytë me bardheblutë nuk po përshtatej dhe palët kanë gjetur gjuhën e përbashkët për të ndërprerë bashkëpunimin. Lojtari ka marrë 20 mijë euro dhe ka prishur kontratën që përfundonte në verë, ndërsa bardheblutë fituan, teksa nuk paguajnë 6-8 mijë euro rrogë në muaj.
“Klubi i Futbollit Tirana njofton ndërprerjen e kontratës me lojtarin Fjoart Jonuzi. Palët kanë ndërprerë me konsensus bashkëpunimin. Falënderojmë Fjoart Jonuzin për kontributin e tij dhe i urojmë suksese në të ardhmen e tij”, shkruhej në njoftimin e Tiranës.
Largimi i Jonuzit nga bardheblutë ishte i paralajmëruar prej kohësh ndaj për mesfushorin kanë shfaqur interes klube pretendente të Superiores, që e shohin si një element shumë të rëndësishëm për t’ia shtuar radhëve të tyre. Jonuzi tashmë pritet të vijojë karrierën te Ballkani, që drejtohet nga Orges Shehi.
Comments are closed
Add Comment