Komuniteti ndërkombëtar ka qenë i shpejtë në reagimin e vetë për të ofruar ndihmë për Turqinë dhe Sirinë, pas tërmetit tragjik që ka rënë në orët e para të mëngjesit të 6 shkurtit, pasuar nga një numër i madh pasgoditjesh të forta.
Të martën në mëngjes, avionët që transportonin ndihma nga Iraku dhe Irani, duke përfshirë ushqime, ilaçe dhe batanije, mbërritën në Aeroportin Ndërkombëtar të Damaskut në Siri, njoftoi media shtetërore siriane SANA.
Japonia njoftoi se do të dërgonte ekipin e shpëtimit nga fatkeqësitë në Turqi. Të hënën mbrëma, i pari nga dy ekipet e ndihmës nga fatkeqësitë u nis nga India për në Turqi me skuadra qensh dhe furnizime mjekësore. Pakistani ka dërguar gjithashtu dy ekipe kërkimi dhe shpëtimi në vendin e shkatërruar, ndërsa Australia dhe Zelanda e Re zotuan fonde për ndihmë humanitare.
Kryeministri australian Anthony Albanese tha të martën se qeveria e tij do të sigurojë një ndihmë “fillestare” prej 10 milion dollarë australianë (6.94 milion dollarë; 5.76 milion £) për të shkuar për grupet humanitare.
Bashkimi Evropian aktivizoi mekanizmin e reagimit ndaj krizave, ndërsa Shtetet e Bashkuara thanë se do të dërgonin dy njësi kërkim-shpëtimi në Turqi. Ekipet e mbrojtjes civile dhe mjekësore palestineze do të dërgohen gjithashtu në Turqi dhe Siri për të ndihmuar në operacionet e shpëtimit.
Ndërkohë, 10 njësi të ushtrisë ruse me më shumë se 300 ushtarë po pastrojnë mbetjet dhe po ndihmojnë në operacionet e kërkim-shpëtimit në Siri, tha Ministria e Mbrojtjes e Rusisë. Rusia është fuqia e huaj më e fortë që vepron në Siri dhe presidenti rus Vladimir Putin ka kohë që është aleat me presidentin sirian Bashar al-Assad.
Zyra e Kombeve të Bashkuara për Koordinimin e Çështjeve Humanitare (UNOCHA) tha se ekipet e reagimit ndaj urgjencës nga Vlerësimi dhe Koordinimi i Katastrofave të Kombeve të Bashkuara (UNDAC), Grupi Ndërkombëtar Këshillimor i Kërkimit dhe Shpëtimit (INSARAG) dhe Ekipet Mjekësore Emergjente të OBSH-së (EMT) janë duke u mobilizuar në Turqi për të ndihmuar në përgjigjen humanitare.