Teksa ishte i ftuar në një prej aktiviteteve të Samitit organizuar nga Dhoma e Biznesit të Diasporës Shqiptare në Tiranë, kryetari i Bashkisë së Tiranës, Erion Veliaj, ka vërejtur një detaj lidhur me flamurin e Shteteve të Bashkuara të Amerikës.
Diskutimi në Samitin e Tretë të Grave të Biznesit të Diasporës po vijonte derisa në momentin kur Veliaj mori fjalën, kërkoi që flamuri i SHBA-së i vendosur përmbys të drejtohej, ndërsa cilësoi që ky ishte një veprim i pakujdesshëm i organizatorëve.
“Para se të filloj, a kemi dikë nga hoteli këtu, nga menaxhimi? Këtë flamurin amerikan e kemi mbrapsht. Kështu që do të preferoja ose t’i heqim fare, ose t’i respektojmë të gjithë. A kemi dikë që mund ta zhvendosë? S’e kam tek amerikano-filia, edhe pse atë e kam, por e kam te fakti që në Tiranë i bëjmë gjërat perfekt, edhe nuk bëjmë gafa të tilla”, u shpreh Veliaj.
Pasi flamujt u zhvendosën, ku flamuri i SHBA-së u vendos drejt me flamujt e drejtë bashkë me atë shqiptar, kryebashkiaku u shpreh se aktiviteti mund të vijojë.