UEFA ka gjobitur Federatën Shqiptare të Futbollit me 44 mijë euro. Vendimi është bërë publik ditën e sotme në faqen zyrtare nga Komisioni Disiplinor i UEFA-s. Shkak i gjobës është bërë ndeshja mes Shqipërisë dhe Polonisë që u zhvillua më 10 shtator në stadiumin “Air Albania” në Tiranë për kualifikimet e “Euro 2024”.
FSHF-ja ka marrë 30 mijë euro gjobë për ndezjen e fishekzjarrëve, hedhjen e sendeve të ndryshme që ndikuan në zhvillimin e ndeshjes. UEFA nuk është ndalur me kaq, por ka urdhëruar edhe mbylljen e pjesshme të stadiumit të Federatës Shqiptare të Futbollit (dmth të gjithë tribunës veriore dhe jugore), për një periudhë provuese prej dyvitesh, duke filluar nga data e këtij vendimi. Ndërsa me 14 mijë euro të tjera, FSHF-ja është gjobitur për bllokimin e rrugëve publike.
UEFA gjithashtu ka paralajmëruar Federatën Shqiptare të Futbollit për sjelljen e pahijshme të skuadrës së saj, për reklamimin e ndaluar të sponsorëve në çanta, për mosrespektimin e kërkesave minimale mjekësore, për organizimin e pamjaftueshëm dhe moszbatimin e një strategjie të duhur të ndarjes së biletave dhe për mediat e paautorizuara në fushë.