Eksodi te Erzeni ishte i pritshëm pas zbritjes së skuadrës shijakase në Kategorinë e Dytë. Dy vitet e fundit kanë qenë të vështira për futbollin shijakas, pasi rrokullisja nga Superiorja është ndalur në Kategorinë e Dytë. Nuk dihet se çfarë do të ndodhë me të ardhmen e Erzenit pasi deri më tani nuk ka lëvizje se kush do të jenë drejtuesit e rinj, apo trajneri që do të jetë te klubi shijakas.
Erzeni pritet që të riorganizohet nga themelet, për të mos pasuar vuajtjet e dy sezoneve të fundit. I radhës që ka deklaruar “divorcin” me skuadrën shijakase, është mesfushori Edi Isteri. 21—vjeçari e ka bërë të ditur lajmin e largimit nga Erzeni përmes një postimi në profilin e tij në rrjetet sociale. Aventura e Isterit te Erzeni zgjati vetëm një sezon, por ma mundur që të shmangnin rënien nga kategoria. Ja njoftimi që ka bërë ish-kapiteni për largimin nga radhët e Erzenit: “Me anë të këtij shkrimi dua t’iu njoftoj që ndërpres bashkëpunimin me KF ERZENI.
Dua të falënderoj shumë nga zemra klubin, që më ngriti si lojtar, si dhe që ishte shtëpia ime e dytë. Falënderoj të gjithë shokët e mi, të cilët ishin pjesë e këtij rrugëtimi. Falënderoj trajnerët që punuam së bashku, falënderoj presidentin Dur Keçi. Ju jam mirënjohës për gjithçka që keni bërë për mua dhe për ekipin e Erzenit. Një falënderim mjaft i madh nga zemra dhe ndoshta më i veçanti shkon për tifozët më të zjarrtë, që gjithmonë na kanë mbështetur dhe në momentet më të vështira. SHIJAKU DO MBETET SHTËPIA IME E DYTË dhe me shumë emocion ju përqafoj të gjithëve, duke i uruar nga zemra ekipit sa më shpejt të ngjitet aty ku i takon”.