Ermal Meta është futbollisti i radhës që ka përfunduar në “radarët” e skuadrave italiane. Sampdoria është skuadra e interesuar për shërbimet e 19-vjeçarit sipas mediave italiane.
Aktualisht Sampdoria militon në Serie B në Itali dhe dëshiron të shmangë rënien në Serinë C. Drejtuesit pëlqejnë karakteristikat e mesfushorit, i cili është mjaft fleksibël dhe mund të luajë në disa role në mesfushë.
Këtë sezon me fanellën e Tiranës ka luajtur në 17 ndeshje , ku ka shënuar edhe 1 gol. Meta është bërë pjesë e ekipit të parë të Tiranës që në verën e vitit 2023.
TRANSFERIMI I JORDI JAKUT TE BOLOGNA
Jordi Jaku është futbollisti më i ri i Bolognas në Itali. 18-vjeçari nga Rrësheni do jetë fillimisht pjesë e moshave U-20 të ekipit, me italianët që kanë investuar 250 mijë euro për mesfushorin. Ndërkohë KF Tirana ka përfituar shumën e rëndësishme si edhe ka mbajtur 15 përqind të kartonit në rast të një tjetër transferimi të talentit të mesfushës.
I dalë nga moshat e Shënkollit, Jaku kaloi në verën e 2022 te Dinamo dhe pas një sezoni u bashkua me Tiranën. Këtë sezon djaloshi ka luajtur tetë takime, për 303 minuta në total.
Djaloshi i Kombëtares U-19 ka luajtur 15 ndeshje me ekipin kuqezi dhe ka spikatur në turnetë ndërkombëtar, ku duket se është “pikasur” nga Bologna. Tanimë Jaku e ka vetë në dorë të ardhmen, me punën më të rëndësishme që nis tani.