Elbasani synon të mbledhë në skuadrën e sezonit të ri lojtarët e këtij qyteti, që aktualisht kanë milituar në ekipe të tjera të vendit. Jo të gjithë mund të vijnë, por disave prej tyre u është bërë ftesa për t’iu bashkuar kësaj skuadre dhe mbetet për t’u parë se si do të rrjedhin ngjarjet.
Emri i parë që ka dalë në skenë në kampin verdheblu është ai i mbrojtësit të Tomorit, Kledis Hida. Hida ka qenë një nga lojtarët më të spikatur në qendër të mbrojtjes, jo vetëm te Tomori, por tek e gjithë Kategoria e Parë.
Me beratasit këtë sezon ai u aktivizua në 25 takime si titullar i padiskutueshëm, duke treguar edhe aftësitë e tij në sulm, ku gjeti rrugën e rrjetës plot tri herë. Më herët ai ka qenë edhe pjesë e Kukësit dhe Elbasanit të Lazes.