Edoardo Reja, ish-trajneri i Shqipërisë ka folur për krizën që po përjeton përfaqësuesja e Italisë. Edoardo Reja për “Mesaggero Veneto” ka nisur një sulm ndaj Claudio Ranierit që refuzoi të drejtonte Italinë, ndërsa bëri një paralelizëm në kohën kur ai drejtonte Shqipërinë.
“Nuk ka gjë më të keqe si refuzimi i fanellës së përfaqësueses, nuk mund të refuzosh të stërvitësh ekipin kombëtar. Është diçka jashtë kësaj bote, ende e mbaj mend ditën kur mora telegramin nga FIGC për t’u paraqitur në kampin stërvitor të U-23.
Rol i dyfishtë? E pamundur kur stërvit Italinë. Duhet të shkosh përreth, të shohësh lojtarë, të flasësh me ta. Kur stërvita Shqipërinë, thirra mbi 50 lojtarë, madje shkova të shihja edhe fëmijët. Pastaj ka nga ata që e refuzojnë, si Ranieri, dhe nga ata që largohen si Mancini, për të shkuar në Arabi. Duket se askush nuk e do ekipin kombëtar: është skandaloze. Ka shumë të huaj, kështu që është e vështirë të zhvillojmë lojtarët tanë të rinj që fitojnë kudo, madje edhe deri te nën-19 vjeç. Duhet t’i detyrojmë klubet të aktivizojnë 4-5 nën-23 vjeç”.