Trajneri i Egnatias, Edlir Tetova, ka pranuar se skuadra e tij kishte bërë një paraqitje me dy tablo ndaj Skënderbeut, në sfidën e parë të Superiores që e humbi në shtëpi me shifrat 0-1. “Ishte një ndeshje me dy tablo. Ishte një pjesë e parë jo e mirë, por goditëm shtyllën tre herë në pjesën e dytë dhe ishim gjatë gjithë kohës në gjysmëfushën e kundërshtarit. Na mungoi goli, por do të shohim në javët në vazhdim.
I japim merita edhe kundërshtarit, na markoi shumë mirë një kundër një, tentoi kundërsulmin. Nga një episod pësuam gol që besoj se ishte i evitueshëm. Megjithatë, ky është vetëm fillimi.
Mendojmë që Skënderbeu me një episod shënoi gol. Ne rastet i krijuam në pjesën e dytë, por ishte vetëm çështje përqendrimi. Do t’i shohim këto gjëra në analizë. Patjetër që nuk shkoi asgjë mirë nga ajo që kishim punuar ndaj u munduam në pjesën e dytë, ndryshuam skemën dhe ishim më shumë para portës” tha Tetova për “MCN” pas përfundimit të sfidës.